ចេះគោរពរបស់ជាកម្មសិទ្ធិអ្នកដទៃ
ការបង្រៀនកូនរបស់អ្នកឲចេះគោរពពិតជារឿងមួយចាំបាច់ខ្លាំងណាស់។ អ្នកអាចចាប់ផ្តើមដោយការបង្រៀនឲចេះគោរពចំពោះរបស់កម្មសិទ្ធិអ្នកដទៃ។ ប្រាប់កូនរបស់អ្នកថា ការចូលផ្ទះគេដោយមិនសុំការអនុញ្ញាតជារឿងមួយខុស។ ដោយគ្មានការអនុញ្ញាត គ្មានអ្នកណាអាចចូលផ្ទះរបស់អ្នកជិតខាងបានឡើយ។ ប្រសិនបើកូនរបស់អ្នកចង់ទៅលេងនៅក្នុងផ្ទះអ្នកជិតខាង ឬលេងរបស់កម្មសិទ្ធិអ្នកជិតខាងដូចជា៖ តុក្តា ឬប្រដាប់ក្មេងលេងផ្សេងៗទៀត កូនរបស់អ្នកអាចសុំការអនុញ្ញាតពីម្ចាស់គេសិន។ នេះជាការអនុវត្តដ៏ល្អមួយ ហើយកូនរបស់អ្នកនឹងចេះសុំការអនុញ្ញាតពីអ្នកដទៃជាមុនសិន មុននឹងប្រថុយចូលផ្ទះអ្នកដទៃ ឬលេងរបស់កម្មសិទ្ធិអ្នកដទៃ។
ចេះនិយាយពាក្យថាអរគុណ
និយាយពាក្យថាអរគុណដល់អ្នកណាម្នាក់ ជាការគោរពអ្នកណាម្នាក់ដែលគេបានធ្វើរឿងអ្វីមួយចំពោះយើង។ ប្រសិនបើកូនរបស់អ្នកខ្ចីរបស់អ្នកដទៃ ឬសុំជំនួយពីអ្នកដទៃ អ្នកអាចបង្រៀនកូនៗរបស់អ្នកអំពី ការចេះនិយាយពាក្យថាអរគុណ និងថ្លែងអំណរគុណចំពោះអ្នកនោះ។
ចេះគោរពមនុស្សចាស់
នៅពេលសាច់ញាតិ ឬអ្នកជិតខាងមកលេងផ្ទះ នោះជាពេលវេលាដ៏ល្អមួយដើម្បីបង្រៀនកូនឲចេះគោរព។ ដំបូង អ្នកអាចប្រាប់កូនៗរបស់អ្នកឲចេះគួរសមចំពោះអ្នកដែលមកលេងផ្ទះដោយការនិយាយពាក្យថា អរុណសួស្តី ឬជម្រាបសួរ អាស្រ័យលើប្រវត្តិវប្បធម៌របស់អ្នក។
យល់ដឹងពីសារៈសំខាន់នៃពាក្យសុំទោស
ក្នុងករណីកំហុសកើតមានឡើង យល់ល្អត្រូវនិយាយពាក្យថា សុំទោសចំពោះអ្នកដទៃ។ បង្រៀនកូនរបស់អ្នកអំពីរឿងនេះ។ នៅពេលកូនរបស់អ្នកធ្វើឲបែកប្រដាប់ប្រដាលេងរបស់មិត្តភក្តិ ឬធ្វើឲមានកំហុសកើតឡើងដោយចេតនា ឬអចេតនា គាត់គួរតែចេះនិយាយពាក្យថាសុំទោសសម្រាប់ទង្វើរបស់គាត់។ ការធ្វើបែបនេះនឹងធ្វើឲអ្នកដទៃអាចលើកលែងទោសឲកូនរបស់អ្នក។
ចេះឲតម្លៃពេលវេលា
ការបង្រៀនកូនៗឲចេះគោរពពេលវេលាជារឿងមួយធម្មតា។ ប៉ុន្តែត្រូវបង្រៀនកូនៗអំពីការចេះឲតម្លៃពេលវេលាអ្នកដទៃ។ អ្វីដែលសំខាន់ត្រូវឲកូនៗរបស់អ្នកចេះគួរសម នៅពេលពួកគេធំឡើង។ នេះជាតួនាទីរបស់ឪពុកម្តាយ៕
ប្រភព៖មង្គលការ