មន្ត្រីនគរបាលស្រុកមុខកំពូលបានឲ្យដឹងថា ស្រីក្រមុំដែលជិតចូលរោងការ ហើយលួចទៅរួមភេទជាមួយសង្សារចាស់ រួចហើយប្តឹងសង្សារចាស់ចោទប្រកាន់ពីបទរំលោភសេពសន្ថវៈនោះ មានឈ្មោះ ប៉ុន ធីតា អាយុ១៨ឆ្នាំ មុខរបរកសិករ និងឃ្វាលសត្វពពែ មានស្រុកកំណើតនៅភូមិចតុលោក ឃុំបារាយណ៍ ស្រុកបារាយណ៍ ខេត្តកំពង់ធំ និងបច្ចុប្បន្នស្នាក់នៅភូមិ-ឃុំកើតហេតុ ។ រីឯបុរសជាសង្សារចាស់ដែលទទួលរងការប្តឹងចោទប្រកាន់ពីសង្សារចាស់របស់ខ្លួននោះ មានឈ្មោះ អ៊ុន ឆ័ង អាយុ២២ឆ្នាំ មុខរបរបើកបរគ្រឿងចក្រ មានទីលំនៅភូមិ-ឃុំកើតហេតុ ។
ប្រភពព័ត៌មានដដែលបានឲ្យដឹងដែរថា កាលពីពាក់កណ្តាលឆ្នាំ២០១៤ ស្រីក្រមុំឈ្មោះ ប៉ុន ធីតា បានមកស្នាក់នៅផ្ទះលោក អ៊ុក សំបូរ ដែលត្រូវជាឪពុករបស់យុវជនឈ្មោះ ប៊ិន ធារ៉ា ។ មកដល់អំឡុងខែកញ្ញាឆ្នាំ២០១៤ លោក អ៊ុន សំបូរ ក៏បានដណ្តឹងនារីឈ្មោះ ប៉ុន ធីតា ឲ្យធ្វើជាភរិយាកូនរបស់គាត់ ។ នៅថ្ងៃទី២៥ខែកុម្ភៈឆ្នាំ២០១៥វេលាម៉ោងប្រមាណជា៩ព្រឹក នារីឈ្មោះប៉ុន ធីតា បានចេញទៅឃ្វាលសត្វពពែនៅខាងក្រោយភូមិដូចសព្វមួយដង ហើយត្រូវបានបុរសជាគូដណ្តឹងឈ្មោះ ប៊ិន ធារ៉ា បានដើរទៅតាម ក៏ចៃដន្យស្រាប់តែឃើញគូដណ្តឹងរបស់ខ្លួនដើរចូលទៅក្នុងព្រៃស្ងាត់មួយកន្លែងជាមួយបុរសម្នាក់ឈ្មោះ អ៊ុន ឆ័ង បាត់មួយសន្ទុះ ។
តាមការរៀបរាប់របស់យុវជន ប៊ិន ធារ៉ា ឲ្យដឹងថា បន្ទាប់ពីបានឃើញសកម្មភាពចាប់អារម្មណ៍បែបនេះ ខ្លួនក៏ដើរទៅលបមើលបន្តទៀត ស្រាប់តែឃើញស្ត្រីជាគូដណ្តឹងរបស់ខ្លួនកំពុងរួមភេទជាមួយយុវជនឈ្មោះ អ៊ុន ឆ័ង ហើយខ្លួនក៏មិនបានរំខានអ្វីដល់អំពើអនាចាររបស់គូដណ្តឹងដែរ គឺខ្លួនសុខចិត្តអង្គុយមើលសកម្មភាពស្ត្រីជាគូដណ្តឹងរបស់ខ្លួនរួមភេទជាមួយដៃគូរហូតដល់ចប់ចុងចប់ដើម ទើបក្រោកដើរត្រឡប់ទៅផ្ទះវិញ ក៏បានយករឿងរ៉ាវដែលបានឃើញផ្ទាល់ភ្នែកនេះប្រាប់ឪពុកម្តាយ និងឈានទៅដល់ធ្វើការសួរនាំស្ត្រីជាគូដណ្តឹងរបស់ខ្លួននោះផង ហើយក៏សុំផ្តាច់ពាក្យវិញតែម្តង ។
ស្រាប់តែដល់វេលាម៉ោងប្រមាណ១៤រសៀលនាថ្ងៃដដែល ស្ត្រីឈ្មោះ ប៉ុន ធីតា បានទៅដាក់ពាក្យប្តឹងដៃគូរួមភេទជាសង្សារចាស់របស់ខ្លួនទៅសមត្ថកិច្ចនគរបាលមូលដ្ឋាន ដោយចោទប្រកាន់ពីបទរំលោភសេពសន្ថវៈទៅវិញ ជាហេតុធ្វើឲ្យអ្នកភូមិមានការហួសចិត្តគ្រប់ៗគ្នា ។
មន្ត្រីនគរបាលស្រុកមុខកំពូលបានបង្ហើបប្រាប់ឲ្យដឹងដែរថា ទំនងជារឿងនេះបែកការណ៍អាម៉ាស់ដល់ឪពុកម្តាយ ដោយសារបុរសជាគូដណ្តឹងតាមទាន់ឃើញនឹងភ្នែក ទើបស្ត្រីឈ្មោះ ប៉ុន ធីតា ដាក់ពាក្យប្តឹងសង្សារចាស់របស់នាងឈ្មោះ អ៊ុន ឆ័ង ពីបទរំលោភសេពសន្ថវៈ ខណៈមន្ត្រីនគរបាលបានលាន់មាត់ថា នៅសល់តែរយៈពេលប្រមាណ១ខែទៀតប៉ុណ្ណោះ នាង ប៉ុន ធីតា នឹងត្រូវចូលរោងការជាមួយយុវជន ប៊ិន ធារ៉ា ប្រកបដោយកិត្តិយស ស្របតាមប្រពៃណីទំនៀមទម្លាប់ខ្មែរ បែរជាមិនគួរណាស្ត្រីឈ្មោះ ប៉ុន ធីតា ហ៊ានប្រព្រឹត្តអំពើអនាចារជាមួយសង្សារចាស់យ៉ាងដូច្នេះសោះ ៕
ប្រភព៖http://www.dtn7.com/2015/02/26/12203.html/?