លោកនាយករដ្ឋមន្រ្តី ហ៊ុន សែន នៅថ្ងៃព្រហស្បតិ៍នេះ បានចោទជាសំណួរទៅកាន់អតីតរដ្ឋមន្ត្រីក្រសួងការបរទេសអូស្ត្រាលី និងជាមិត្តចាស់ លោកGareth Evans ថាមូលហេតុអ្វីបានជារិះគន់រូបលោកកាលពីឆ្នាំ២០១៤ នៅក្នុងអត្ថបទមួយដែលទាមទារឲ្យសហគមន៍អន្តរជាតិដាក់ទណ្ឌកម្មមកលើមេដឹកនាំកម្ពុជា។
លោក ហ៊ុន សែន បានលើកឡើងបែបនេះនៅក្នុងសន្និសីទអន្តរជាតិស្តីពីវឌ្ឍនភាព បញ្ហាប្រឈម និងកាលានុវត្តភាពនៅតំបន់អាស៊ីប៉ាស៊ីហ្វិក លើកទី១០ ដែលធ្វើឡើងនៅក្នុងសណ្ជាគារសូហ្វីតែលភ្នំពេញ។ លោកGareth Evansដែលបានចូលរួមសន្និសីទនេះ បានអង្គុយស្តាប់លោកនាយករដ្ឋមន្រ្តីថ្លែងសុន្ទរកថា ពីខាងក្រោយ។ លោកហ៊ុន សែន បានថ្លែងថាលោកGareth Evans ជាមិត្តភ័ក្រ្តចាស់របស់រូបលោក និងធ្លាប់មានអនុស្សារីយ៍ជាមួយគ្នាក្នុងការចរចាសម្រាប់សន្ធិសញ្ញាទីក្រុងប៉ារីស និងសន្តិភាពសម្រាប់កម្ពុជា។
លោកនាយករដ្ឋមន្រ្តីថ្លែងបែបអន់ចិត្ត និងហាក់ជាលេងសើចថាមូលហេតុអ្វីបានជាលោកGareth Evansរិះគន់លោកនៅក្នុងអត្ថបទសារព័ត៌មានដែលត្រូវបានចុះផ្សាយនៅក្នុងកាសែតភ្នំពេញប៉ុស្តិ៍ និងសារព័ត៌មានអន្តរជាតិផ្សេងៗទៀត។ លោកនាយករដ្ឋមន្រ្តីបានថ្លែងថា«ខ្ញុំមិនដឹងឯកឧត្តម(Gareth Evans)កើតជំងឺអី បានជាឆ្នាំទៅតិះទៀនខ្ញុំ។ តែខ្ញុំចេះតែឆ្ងល់ថាមិត្តភ័ក្រ្តចាស់ ហេតុអីឆ្នាំទៅឃើញតិះទៀនខ្ញុំនៅក្នុងសារព័ត៌មាន»។ លោកបញ្ជាក់ថា«…ប៉ុនយើងរាប់អានគ្នាតទៅទៀត ឬឈប់រាប់អានគ្នា តែខ្ញុំអត់បានមាត់ទេណា ខ្ញុំនៅស្ងៀមព្រោះខ្ញុំនៅនឹងឃើញអនុស្សារីយ៍ដែលឯកឧត្តមទទួលខ្ញុំ យើងរាក់ទាក់អីជាមួយគ្នា ចរចាជាមួយគ្នា…»។
លោកនាយករដ្ឋមន្រ្តីបានថ្លែងបន្តថា«ខ្ញុំនិយាយលេងទេ ប៉ិនលេងផងមែនផង»។
កាលពីថ្ងៃទី ០៧ ខែមីនា ឆ្នាំ២០១៤ កាសែតភ្នំពេញប៉ុស្តិ៍បានចុះផ្សាយអត្ថបទបែបទស្សនៈរបស់លោកEvans។ អត្ថបទបានចុះផ្សាយថា«វាយូរណាស់ពេកហើយដែលលោក ហ៊ុន សែន និងសហការីរបស់គាត់មិនទទួលខុសត្រូវចំពោះអំពើហិង្សាការរំលោភ បំពានសិទ្ធិមនុស្ស អំពើពុករលួយ និងប្រព័ន្ធផ្សព្វផ្សាយ និងការប្រើល្បិចបោកប្រាស់ក្នុងការបោះឆ្នោត...»។ លោកបន្តថា«ខ្ញុំស្គាល់លោក ហ៊ុន សែន និងបានធ្វើការងារជាមួយគាត់កាលពីអតីតកាល។ ខ្ញុំបានតទល់នឹងការរិះគន់ជាសាធារណៈខ្លាំងក្លារហូតមកឥឡូវនេះ ដោយសារខ្ញុំគិតថា វាមានសង្ឃឹមសម្រាប់គាត់ និងរដ្ឋាភិបាលរបស់គាត់ក្នុងការឈានទៅរកភាពល្អប្រសើរ។ ប៉ុន្តែឥរិយាបថរបស់ពួកគាត់ឥឡូវនេះបានលើសពីអ្វីដែលអាចទ្រាំបាន ហើយវាដល់ពេលហើយដែលមេដឹកនាំនយោបាយកម្ពុជា គួរត្រូវបានស៊ើបអង្កេត និងដាក់ទារុណកម្មដោយសហគមន៍អន្តរជាតិ»។
គួរបញ្ជាក់ថាលោកGareth Evans ជាអតីតរដ្ឋមន្រ្តីការបរទេសអូស្រ្តាលីចាប់ពីឆ្នាំ១៩៨៨ដល់ឆ្នាំ១៩៩៦។ លោកបានដើរតួនាទីសំខាន់មួយក្នុងការចរចា ដើម្បីស្វែងរកសន្តិភាពសម្រាប់កម្ពុជា៕
ប្រភព៖ http://vodhotnews.com/27670
