នៅក្នុងគេហទំព័រដេញថ្លៃ MercadoLibre ដែលប្រើប្រាស់ដោយជនជាតិវេណេហ្ស៊ុយអេឡាដើម្បីផ្គត់ផ្គង់ទំនិញកម្រ បានដាក់លក់ស្រោមអនាម័យជាកញ្ចប់ក្នុងតម្លៃ ៧៥៥ដុល្លារ ដែលមួយកញ្ចប់មាន ៣៦ស្រោម។ តម្លៃស្រោមអនាម័យនេះ គឺជិតស្មើនឹងប្រាក់ខែរបស់ជនជាតិវេណេហ្ស៊ុយអេឡា ដែលទទួលបានជាមធ្យម ៨៨៩ដុល្លារក្នុងមួយខែ។
“ប្រទេសនេះ ពិតជារញ៉េរញ៉ៃមែន… ពេលនេះចង់ឡើងឋានសួគ៌ ក៏ត្រូវឈរតម្រង់ជួររាប់ម៉ោងដែរ”។ នេះជាការលើកឡើងរបស់បុរសវ័យ ៣១ឆ្នាំ Jonatan Montilla ដែលជាប្រធានក្រុមហ៊ុនផ្សព្វផ្សាយសិល្បៈ។ វេណេហ្ស៊ុយអេឡា គឺជាប្រទេសមួយដែលមានអត្រាឆ្លងមេរោគអេដស៍ និងមានក្មេងស្រីពពោះច្រើនបំផុតមួយ ក្នុងចំណោមប្រទេសនានា នៅទ្វីបអាមេរិកឡាទីន។ បើគ្មានស្រោមអនាម័យប្រើប្រាស់ នោះប្រជាជនពិតជារងទុក្ខលំបាកខ្លាំង ដោយការឆ្លងមេរោគអេដស៍ និងមានកូនមិនសមតាមប្រាថ្នា ព្រោះការរំលូតកូននៅក្នុងប្រទេសមួយនេះក៏ជារឿងខុសច្បាប់ដែរ។
តម្លៃប្រេងធ្លាក់ចុះខ្លាំង បានធ្វើឲ្យការផ្គត់ផ្គង់ទំនិញផ្សេងៗនៅក្នុងប្រទេសវេណេហ្ស៊ុយអេឡា ដែលជាសមាជិករបស់អង្គការបណ្ដាប្រទេសអ្នកនាំប្រេងចេញ(OPEC) ជួបវិបត្តិស្ទើរងើបមុខមិនរួច។ នៅប្រទេសមួយនេះ សេដ្ឋកិច្ចពឹងផ្អែកទៅលើការនាំចេញប្រេងស្ទើរទាំងស្រុង ហើយចំណូលដែលបានមកពីបរទេស ៩៥ភាគរយ ពឹងផ្អែកលើផលិតផលប្រេង។ ៧ខែចុងក្រោយនេះ តម្លៃប្រេងបានធ្លាក់ចុះ ៦០ភាគរយ ដែលធ្វើឲ្យវេណេហ្ស៊ុយអេឡាជួបវិបត្តិយ៉ាងខ្លាំង៕
ប្រភព៖ Sabay.com