ខេត្តស្ទឹងត្រែង ៖ ប្តីប្រពន្ធ ២នាក់ ដែលជាមុខសញ្ញាចែកចាយគ្រឿងញៀន នៅក្រុងស្ទឹងត្រែង ត្រូវបានកម្លាំងកងរាជអាវុធហត្ថខេត្ត ឃាត់ខ្លួន បញ្ជូនមកទីបញ្ជាការដ្ឋានកងរាជអាវុធហត្ថខេត្ត កាលពីថ្ងៃទី២៦ ខែកុម្ភៈ ឆ្នាំ២០១៥ នៅចំណុចក្នុងបន្ទប់ផ្ទះជួល ស្ថិតក្នុងភូមិព្រែក សង្កាត់ស្ទឹងត្រែង ក្រុង ខេត្តស្ទឹងត្រែង។
ជនសង្ស័យទី១ឈ្មោះ គឹម សុភា ភេទប្រុស អាយុ៣៥ឆ្នាំ មុខរបរជាបុគ្គលិកអគ្គិសនីខេត្តស្ទឹងត្រែង នឹងទី២ឈ្មោះ អឿន លីហ្សា ភេទស្រី អាយុ២៥ឆ្នាំ ជនសង្ស័យទាំង ២នាក់ ត្រូវជាប្តីប្រពន្ធនឹងគ្នា មានស្រុកកំណើតនៅខេត្តកណ្តាល ទីលំនៅបច្ចុប្បន្ននៅបន្ទប់ផ្ទះជួលចំណុចឃាត់ខ្លួនខាងលើ។
មុនពេលឈានទៅដល់ការឃាត់ខ្លួន
កម្លាំងអាវុធហត្ថខេត្តបានធ្វើការស៊ើបអង្គេតអស់រយៈពេលជាច្រើនថ្ងៃមកហើយ ហើយជនសង្ស័យទាំង២នាក់ខាងលើសុទ្ធសឹងតែជាមុខសញ្ញាចាស់។ លុះមកដល់យប់ថ្ងៃទី២៦ ខែកុម្ភៈ ឆ្នាំ២០១៥ ដោយទទួលបានព័ត៌មានថាជនសង្ស័យទាំង២នាក់ កំពុងតែធ្វើសកម្មភាពវេចខ្ចប់ថ្នាំញឿនជាកញ្ចប់តូចៗ សម្រាប់ទុកចែកចាយ ភ្លាមៗនោះ លោកមេបញ្ជាការបានដាក់កម្លាំងចុះទៅដល់បន្ទប់ផ្ទះជួល ធ្វើការឃាត់ខ្លួនភ្លាមៗតែម្តង។
ខណៈពេលកម្លាំងចុះឃាត់ខ្លួន ភ្លាមៗនោះមន្ត្រីជំនាញបានដកហូតបានវត្ថុតាង រួមមាន ថ្នាំញៀនមេតំហ្វេតាមីន ប្រភេទម្សៅក្រាម ពណ៌ស (ម៉ាទឹកកក) ចំនួន ១៣ កញ្ចប់ ក្នុងនោះមាន ៤កញ្ចប់ធំ នឹង៩កញ្ចប់តូច នឹងសម្ភារលុយកាក់មួយចំនួនទៀត៕
ប្រភព៖ http://chnchannel.com/2015/02/27/46812.html
